Kategori: Ukategorisert

Den legendariske gitaristen Rolf Erik Syversen er død 79 år gammal. Han var med i NRK allereie på 1950-talet og var aktiv musikar fram til sin død.

I seinare år blei han ofte møtt med spørsmålet «er du den verkelege Rolf Erik Syversen?».

Nye generasjonar hadde kome til og i musikkmiljøet var han kjend av alle.

Han spelte med Arnt Haugens orkester i «Husker du?», med Steinar Bottens orkester på Dovre og mange fleire. I seinare år hadde han nært samarbeid med Håvard Svendsrud med konsertar rundt i landet.

Etter koronapause for Fjelljomfestivalen i fjor kunne endeleg Spelemannslaget Fjelljom i Stryn be inn til den sjuande i rekkja fyrste helga i oktober i år. Som vanleg hadde festivalen ei fin blanding av konsertar og kurs, og  endeleg fekk publikum friske opp att dansekunstane. Festivalen har satsa på korte inspirasjonskurs. Og dei som sytte for inspirasjon denne gongen var Britt Pernille Frøholm på hardingfele, Kari Grøsland på fele, Einar Eimhjellen med munnspel, Malin Alander i song og Kristina Farstad Bjørdal og Håvard Svendsrud på trekkspel.

Fredagskvelden stod i trekkspelet sitt teikn med ein storveges solokonsert av Håvard Svendsrud som tok føre seg trekkspelet si historie. Og etterpå vart det svingom til frisk trekkspelmusikk frå trioen Håvard Svendsrud, Kristina Farstad Bjørdal og Marius Berglund. Laurdag på dagtid heldt Spelemannslaget Fjelljom og fleire solistar temakonsert om Fel-Jakup som vart fødd i Skjåk for 200 år sidan og som likte seg godt i Nordfjord og på Sunnmøre. Ola Grøsland hadde teke turen frå Vågå og stod for glimrande forteljing. Festivalen vart avslutta med festkveld i ungdomshuset Fjellvarden der både Fjelljom og medlemer frå Fjordane og Møre munnspellag sytte for dansemusikk etter ein flott konsert med mange artistar  og stor spennvidde.

Eit av høgdepunkta på festkvelden var utdelinga av Bolstadprisen. Den er ei vidareføring av Emil Bolstads legat som vart skipa i 1991 med hovudføremål å gje stipend for utdanning til unge musikarar i Stryn som vil vidareføre Per Bolstad sin musikktradisjon. I 2018 vart legatet avslutta og midlane overført til den nyoppretta Bolstadprisen som Spelemannslaget Fjelljom har ansvaret for. Det geografiske området er ikkje lenger avgrensa til Stryn, og i føresegnene står at «mottakaren må ha synt både interesse for og dugleik i vidareføring av folkemusikken og folkedansen generelt og gjerne innan tradisjonen frå Bolstadmusikarane.» Bolstadprisen er tidlegare tildelt dei unge felespelarane Eli Fridtun Vereide (2018) og Åsmund Arnesen Farstad (2019).

Årets verdige prismottakar Kristina Farstad Bjørdal hadde utruleg nok ikkje fått mistanke om kva ho skulle oppleve denne kvelden før prisutdelar Håvard Svendsrud kalla henne opp på scena for å ta imot diplom og gåvesjekk på 20 000 kroner. I talen sin sa Svendsrud mellom anna at ho har markert seg som ein av sin generasjons mest aktive og sindige utøvarar på trekksepl, også til inspirasjon for veldig mange. Prisvinnaren vart tydeleg rørt og sa at «dette var ekstremt uventa og utruleg stas. Per Bolstad sin musikk har betydd noko spesielt heile livet.» Og her kan vi legge til at ho nær sagt frå fødselen fekk høyre far sin framføre Per Bolstad sin musikk meisterleg på trekkspel. Ho har no fullført utdanninga på NMH og satsar på frilanslivet. Vi ynskjer hjarteleg til lukke med prisen og vonar og trur ho vil inspirere til rekruttering for trekkspelet og vidareføring av tradisjonsmusikken.

Arne M. Sølvberg

Den svenske trekkspelmeisteren Lennart Wärmell døde 1. oktober nær 94 år gammal.
Frå 40-talet var han ein av dei mest profilerte blant nordiske trekkspelarar. Han var leiar for Accordion Club i Stockholm i over 50 år.
Han hadde sitt eige orkester med langvarige engasjement på Gröna Lund og turnerte land og rike rundt. Blant anna var han akkompagnatør til Harry Brandelius og spelte saman med Ebbe Jularbo.
Saman med fru Liz dreiv han plate- og noteselskap og skreiv læreverk for trekkspel.
Med åra blei det eit stort tal plateproduksjonar og komposisjonar av populærmusikk. Også som arrangør stod han for eit omfattande arbeid.
Lennart Wärmell var ofte i Norge og hadde tett samarbeid med Norilds Musikk som også publiserte hans artiklar om eit lang liv i musikken teneste.
Næraste sørgande er hans kone Liz.

Britt Pernille Frøholm skal instruere i framføring av Kjellstad-slåttar på hardingfele.

Publisert 1. oktober 2021.

Fredag og laurdag 1. og 2. oktober blir Fjelljomfestivalen i Stryn arrangert.

Det er lagt opp eit omfattande program. Fredag er det lagt opp til trekkspelkveld på forsamlingshuset Fjellvarden. Håvard Svendsrud skal presentere trekkspelet gjennom tidene. Laurdag 2. oktober blir det midt på dagen temaknsert om Fel-Jakub (1821 – 1876) på Fjellvarden. Same stad og dag blir det festkveld med Kari Grøsland, fele, Malin Alander, sang, Einar Eimhjellen, munnspel, Håvard Svendsrud, Kristina Farstad Bjørdal, trekkspel, Asbjørn og Arne Sølvberg, dans.

Spelemannslaget Fjelljom blir med og det vert utdeling av Bolstadprisen.

Heile laurdag blir det forskjellige kurs, fele og hardingfele, trekkspel, sang og munnspel.

Der var fleire som hevda at der må vere synske evner i Ørskog Trekkspelorkester: For eit halvt år sidan blei det bestemt å legge «opningskonserten» til søndag 26. september – «då må vere restriksjonane vere oppheva».

BB – KJELL OPSAL
BB – BENJAMIN B. OPSAL (foto)

Med fullsett hus kunne trekkspeltonane lyde ut i storsalen på kulturhuset – 24 timar (!) etter av statsministeren hadde kunngjort slutt på det unormale samfunnet.
Dette kunne merkast på publikum som kom frå heile distrikt, sør og nord i fylket.

Far og son Svendsrud
Det blei invitert til allsang, virtuost klassisk spel av far og son Svendsrud. Tenåringen Oskar imponerte stort i tolkninga av «Cubansk akvarell» og i samspelet med faren. Her stod norske Christian Liebaks klassikar «Orpheum intermesso» på repertoaret.
Gjennom konserten var det mange aktørar som bolstra seg på scena. Daniel Falcon Græsdal styrte Ørskog Allspelorkester som spelte både Jularbos «Min förste komposition» – solist Marius Berglund på toradar, og Per Bolstads «Glade Ålesund» med Øystein Vestre som sangsolist. Han var også programleiar og kunne presentere eit tettpakke program.

Jubilant
Eitt av høgdepunkta var gratulasjonen til 90 års jubilant og trekkspelar Leif Øye frå Hjørundfjorden, men med nær tilknyting til Ørskog.
Han blei tileigna Brandelius-slageren «Med en enkel tulipan» pluss at orkesteret med barnebarnet Inga-Lill Øye Lännerholm som solist framførte Leif sin komposisjon «Vals til Slogen» til tekst av Stein Nupen. Slogen rager rett over heimen til Leif og familie – og der han tallause gongar har gått til topps – 1500 meter (pluss) over havet!

Alltid suksess
Multikunstnaren Odd Arne Halaas gjer alltid suksess med trekkspelet, songen og ikkje minst historiene – som han har mange av.
Janne Holseter som også ofte har vore med, stilte suverent opp som sangsolist og i duettar.
Midtvegs baud Ørskog Bygdekvinnellag på kaffi og kaker – og praten gjekk livleg rundt borda i sidesalen. Populært.
Det var stort aldersspenn og blant tenåringane var også Gina Giske frå Engesetdal som var solist i Vera Lynn-slageren «White Cliffs of Dover» – vakker tolkning av denne sangen så mange kjenner frå krigen.
Kompgruppa Reidar Hovde, Sigmund Slaeen og Roe Skavnes slo an tonen til «Lille vackre Anna» som Alf Prøysen gjorde kjent.

Annas vise
Ein sang som er blitt veldig kjent i seinare tid er «Annas vise» av svenske Leif Göras. Daniel hadde laga eit fint arrangement og let oss høyre melodien for to trekkspel og fløyte med bror Miguel og Sofie Berge. Etterkvart fall Halaas inn med kjenslevar sang. Vakker!

Populære melodiar
Allspelorkesteret la inn populære gammaldansmelodiar i polka, vals og reinlendertakt. Og Halaas var solist i Hans Rotmos «Dansen på Nedre Elvehavn» til eige trekkspelakkompagnement. Nydeleg.
Medan sonen Oskar var med i orkesteret, var far Håvard frampå i fleire samanhenger, slik som virtuosnummeret Jolly Caballeiro.
Ein festleg duett med Halaas og Janne Holseter, «Mary Strand» av Evert Taube.

Finalen
Alle var med i finalen – først Livet i Finnskogarna, og så Calle Schewens vals der musikarar, sangsolistar og publikum fekk taket nærast til å lette seg.
Arrangøren Ørskog Trekkspelorkester fekk mange spørsmål om tid for neste arrangement.
Sidan dette var planlagt før opphevinga av restriksjonane, har vi i den uvisse situasjonen ikkje teke sjansen på å tidfeste fleire arrangement.
Men det er klart at meir skal det bli – og langt opp og fram er det bestemt at 8. mai neste år blir det Fredskonsert, seier Reidar Opsal som lover meir musikk før den tid..

Gruppa frå Engerdal/Østerdalen med Ragnar Johnsen som leiar spelte seg til topps i Kappspell i regi av Norske Trekkspilleres Landsforbund.

Finalen fann stad på Rudi Gard i Gudbrandsdal der Møre-gruppa Varde kom på andreplass og Grindstuen & Midtlis orkester på tredje.

Dommarpanelet konstaterte at det var høgt nivå blant finalistane.

Publikum kunne følge konkurransen på nettet.

Med i Happy Skvett spelar: Ragnar Johnsen, trekkspel, Jan Ekeland, toradar, Stefan Østgård, trekkspel, Idun Østgård, fele, Anita Brustad Johnsen, trekkspel, Gunn

Vesterheim, toradar,

Morten Brustad, gitar og Odd Negård, fele.

Dommarar: Oline S. Bakkom, Willy Rustad, Baste Antun og Rikke van Ommeren.

I Møre-gruppa Varde spelte desse:

Kristina Bjørdal Farstad, trekkspel, Marius Berglund, trekkspel, Elin Dyrkorn, fele, Bernt Hansen, bass og Reidar Dahle, gitar.

Grindstuen & Midtlis orkester blei vinnar under Landsfestivalen i gammaldans i Lom i 2015.

NTL har dermed teke opp att Kappspell som NRK tidlegare har hatt med stor suksess. Willy Rustad var ein krumtapp for arrangementet den gongen – og no stilte han på som dommar.

Programleiarar på Rudi Gard var Arild Hoksnes og NTL-sjef Odd Arne Halaas.

Førstepremien var på 20.000 kroner.

I tillegg til kappspellet var det ei rekke programinnslag på Rudi denne siste helga i august.

Knut Buen med fela og Håvard Svendsrud er eit lukkekast av ein kombinasjon. Dei er ofte ute på vegen og gler sitt publikum med sin heilt spesielle konsertar.

Her levandegjer dei ikkje berre den tradisjonelle folkemusikken, men har på ei ny CD-plate vist eit kvalitetssterkt samarbeid. Det gjeld både for framføring og komposisjonar skapt av dei to.

Knut Buen har ordet i si makt og les stemningsfullt fleire av sine dikt.

Bildekunstnaren Tone Buen løfter produksjon med sine nasjonalromantisk inspirerte illustrasjonar til innleggskortet.

Her smelter alle dei elementa saman til ein naturleg heilskap og gjer heile produktet til ei sann nyting.

I tider der vi gjennom snart alle kanalar blir overdynga med alle kategorier inntrykk, er det godt å stoppe opp ved genuint meisterspel.

Slik er denne produksjonen som eit gullkanta smykke presentert av to av våre fremste kunstnarar utrusta med nettopp den gløden som skal til for å skape eit slikt resultat.

Knut Buen (f. 1948) er ein høgt profilert folkekunstnar – som også kan målbinde sitt publikum både verbalt og med fela.

Håvard Svendsrud (f. 1974) er av tidas fremste virtuosar på trekkspelet med imponerande breidde over repertoaret.

Det er til å gle seg over at vi kan få oppleve slik nyskapande folkekunst – som kan stå seg godt for lange tider.

Ørskog 31. august 2021 – Kjell Opsal/Norild

I fem dagar til ende blir det dragspelsfestival i ”Lusta” Torsby i Värmland.
Ei rekke av Nordens fremste stiller opp på Sundquist-träffen som er lagt til dagane 30. juni – 4. juli 2021.

Arrangør er foreningen Ragnar Sundquist Vänner og lokalitetane er i området ved Sundquist-museet.

I tillegg blir der konsert i Fryksända kyrka 2. juli.

Artistlista er ei oppvisning av mange av dei fremste: Det er namn som Nils Fläcke, Anders Larsson, Annika Andersson, Leffe Jonsson,Jo-Fredrik Øiamo, Fredrik Johansen, Beiron Hultman, Tore og Rune Svendsberget, Peter Liljedal, pluss mange fleire. (Sjå eige programoppsett)

Laurdag 3. juli får festivalen besøk av Lena Jularbo Brauner.

Musikken ein kan vente seg desse dagane er frå det klassiske trekkspelrepertoaret av historiske stjerner som Carl Jularbo, Ragnar Sundquist og mange av deira samtidige.

Dragspelsprofessoren Bo Gäfvert skal delta i eit Gösta Westerlund-seminar og Jan Olsson planlegg opptak av program for Exporadion.

Under ein sommar med avlyste festivalar (bl.a. Ransäter) er det eit lyspunkt at Roger Snäll & co lager i stand Sundquist-träffen.